Үйлчлүүлэгчийн мэдрэмж гэж юу вэ?

Үйлчлүүлэгчийн мэдрэмж гэж юу вэ?

Үйлчлүүлэгчийн мэдрэмж гэдэг их сонин. Тухайн байгууллагыг гаднаас нь хараад мэдрэх мэдрэмж нэг өөр байхад, тухайн байгууллага, үйлчилгээний газраар үйлчлүүлээд гарсны дараа төрөх мэдрэмж бас өөр байж болно. Өөрөөр хэлбэл, зөвхөн гадаад үзэмж, тохижилт нь үйлчлүүлэгчдэд  дангаараа сайхан мэдрэмжийг төрүүлдэггүй, харин үйлчилгээ авсны дараа буюу тухайн газраас гарч явсны дараа төрдөг тэрхүү мэдрэмжийг үйлчлүүлэгчийн мэдрэмж гэж ойлгож болно.  Үйлчлүүлэгчийн мэдрэмжинд хэд хэдэн зүйлс нөлөөлдөг. Хэрэв хэрэглэгч кофе шоп, жигнэмэгний дэлгүүрт орсон бол тухайн газраас үнэртэх кофе, жигнэмэгний үнэр нь түүний үнэрлэх мэдрэхүйгээр дамжин түүнд сайхан мэдрэмжийг төрүүлж болно. Гэвч, кассан дээр бичүүлэх үед ажилтны гаргасан хайнга байдал, үл хүндэтгэсэн харилцаа, эсвэл бүтээгдэхүүнээ үл мэдэх байдал нь өнөөх үнэрээр дамжин ирсэн сайхан мэдрэмжийг хормын төдийд үгүй хийж орхидог.  Улмаар үйлчлүүлэгчид гэнэт би яах гэж ийшээ орж ирлээ гэсэн асуултыг өөрөөсөө тавихад хүргэдэг. Ингээд тэрхүү жигнэмэг, кофег зооглох үед анх төрж байсан сайхан мэдрэмж үгүй болсон тул, амт нь ч сул санагдаад, кофе ч амтгүй мэт сэтгэгдэл төрж, тухайн бүтээгдэхүүн үйлчилгээнээс авах таашаалыг бүрэн авч чадалгүй гардаг. Цаашлаад, тухайн газрын үнэ нь ч үнэтэй санагдаад эхэлдэг. Эдгээр сөрөг мэдрэмжүүд нь үйлчлүүлэгчийн далд ухамсарт эсвэл таагүй дурсамж болж үлдэнэ, эсвэл тухайн газрын талаар бүрмөсөн мартахад нөлөөлдөг байна. Улмаар дахиж тийшээ орох хүсэл төрөхөө больдог. Үйлчлүүлэгчийн мэдрэмж нь өөрөө их эмзэг, бас шийдвэрт нь хүчтэй нөлөөлдөг тул үйлчлүүлэгчдэд дээд зэргийн мэдрэмжийг өгөхийн төлөө амжилттай яваа байгууллага бүрийн ажилтнууд өдөр бүр хичээж, нэгэн стандартаар ажиллаж байна.