Нийгмийн сүлжээний нөлөөлөгчид, коммент бичигчид уламжлалт борлуулалтын хэв маягийг үгүй хийж шинэ давалгааг үүсгэж байгаа өнөө үед, тэд уламжлалт маркетингаас илүү хүмүүсийн худалдан авалтанд нөлөөлж байна.  Ингэснээр үйлчлүүлэгчид, тэр дундаа  хувь хүмүүс компанийн хувьцаа эзэмшигчид, гүйцэтгэх захирлуудаас илүү бизнест нөлөөлж байгааг бизнес эрхлэгчид анзаарч байна.

2019 оны 8-р сард Apple, Amazon, Bank of America зэрэг АНУ-ын 200 орчим томоохон бизнесийн захирлуудаас бүрдсэн Бизнесийн дугуй ширээний уулзалтын үеэр, тэд үйлчлүүлэгч дээр илүү  их төвлөрсөн анхаарал татахуйц нэгэн мэдэгдлийг гаргасан байна. Энэхүү мэдэгдэлдээ, тэд корпорацийн зорилгын талаарх тодорхойлолтыг шинэчлэн тодорхойлсон байна. Ингэхдээ корпорацийн гол зорилгыг өөрийн хувьцаа эзэмшигчдэд үйлчилж, ашиг орлогыг максимум түвшинд хүргэхэд анхаарч, хөрөнгө оруулах биш, харин ажилтнуудаа хөгжүүлж сургахад илүү их хөрөнгө оруулалт хийж, үйлчлүүлэгчдэд  бодит үнэ цэнийг хүргэхэд чиглэнэ гэсэн байна.  Ингэснээр орчин цагийн эдийн засгийн шинэ урсгалыг илүү сайн тодорхойлж өгсөн бөгөөд энэ нь үйлчлүүлэгч дээр төвлөрсөн эдийн засаг юм.

Үйлчүүлэгч дээр төвлөрсөн эдийн засгаас компаниуд илүү ихээр үр өгөөжөө хүртэхийн тулд компаниуд үйлчлүүлэгчийнхээ хэрэгцээ ба хүлээлтийг үнэхээр сайн ойлгож, улмаар компанийхаа бүхий л үйл ажиллагааг урьд хожид байгаагүйгээр эдгээр хүчин зүйлс дээр төвлөрүүлэх шаардлагатай болж байна. Үйлчлүүлэгчдээ нэгдүгээрт тавьж, тэдэнд ач холбогдол өгч ажиллана гэдэг нь хэлтэс хоорондын уялдаа холбоог сайжруулах, цаашлаад үйлчлүүлэгчийн туулах цэгүүд дээр байгаа хэлтсүүд, ажилтнуудын  зүгээс бий болох аливаа саад бэрхшээлүүдийг арилгана гэсэн үг юм. Үүний тулд, компани илүү  үр ашигтай цахим сувгуудыг бий болгохоос гадна, ямар нэг асуудал чирэгдэлгүй, мэргэжлийн түвшинд шууд үйлчилгээ үзүүлж чадах тийм ажилтнуудыг сургаж хөгжүүлдэг бизнесийн соёлыг бүтээх нь хамгийн чухал.

Хэрэглэгчийн үйлчилгээг сайжруулахын тулд  зүгээр ярих биш, харин бодитоор үйлдэж, үзүүлэх нь чухал. Жишээ нь саяхан хэдэн сарын өмнө Бритиш Эйрлайнс компанийн ажилтнууд ажил хаясан бөгөөд энэ асуудлын хамгийн том суурь шалтгаан нь үйлчилгээний доголдол байсан. Зорчигчдын гаргасан гомдлоос нь харахад, тухайн компанийн Лавлах төв болон бусад харилцагчийн үйлчилгээний ажилтнууд зорчигчдод нислэгийн талаар байнгын буруу мэдээлэл өгөх, цаашлаад утсанд болон чатанд хариу өгөхгүй таг болдог асуудлууд зонхилж байсан.

Мэдээж хэрэг өөрийн үйлчлүүлэгчдийн зүгээс ирж байгаа гомдол, саналууд, чиг хандлагуудад хэрхэн хариу үзүүлж, шийдвэрлэх нь тухайн компани болон гүйцэтгэх захирлынх нь сонголт боловч үйлчлүүлэгчийн мэдрэмж, сэтгэл ханамжийг анхаарч, үйл ажиллагаандаа бодит өөрчлөлт хийж чадсан компаниуд л үйлчлүүлэгч дээр төвлөрсөн  эдийн засгаас хамгийн их үр өгөөжөө авч байна. Хэрэглэгчийн мэдрэмжээ сайжруулж, үнэнч хэрэглэгчдийнхээ тоог нэмэгдүүлснээр компаниуд тогтвортой хөгжлийг бий болгож байна.  Харин зөвхөн өнөө маргаашийн ашигт ажиллагаанд хамаг анхаарлаа хандуулж, бизнесийн уламжлалт хэв маягаар бизнесийн үйл ажиллагаа явуулж байгаа компаниудын хувьд илүү эрч хүчтэй, өрсөлдөгч компаниуддаа үйлчлүүлэгчдээ алдсаар байна.

Энэ бүгдээс харахад,  үйлчлүүлэгчийн эдийн засаг давамгайлсан өнөө үед, компанийн гүйцэтгэх захирлыг компанийн удирдлагаас илүүтэй тухайн компанийн үйлчлүүлэгчид сонгож байна. Хэрэв удирдлага нь үйлчлүүлэгчиддээ тохирсон үйлчилгээний стратегийг бий болгож, үзүүлж чадахгүй бол, үйлчлүүлэгчид нь хамгийн шударгаар дүнг нь тавьдаг болсон. Тиймээс үйлчилгээний соёл, чанар, мэдрэмж дээр төвлөрч чаддаг, бодит ажил хэрэг болгож чаддаг гүйцэтгэх захиралтай болох нь чухал болжээ.